Удирдлагын мэндчилгээ
Эрхэм даатгуулагч, иргэн, ажил олгогч Та бүхэнд энэ өдрийн мэндийг хүргэе.
Төв аймгийн Нийгмийн даатгалын газар нь иргэдийн нийгмийн баталгааг хангах зорилгоор нийгмийн даатгалын хууль тогтоомжийн хэрэгжилтийг хангуулж, даатгуулагч, иргэн, ажил олгогчид нийгмийн даатгалын үйлчилгээг чирэгдэлгүй, хүртээмжтэй хүргэн ажиллаж байна. Тус газар Төв аймгийн хэмжээнд 892 ажил олгогч, 19.1 мянган даатгуулагчийг албан журмаар, 5.2 мянган даатгуулагчийг сайн дураар нийгмийн даатгалд хамруулж, нийгмийн даатгалын сангаас жилд 20.0 мянга орчим даатгуулагчид тэтгэвэр, тэтгэмж, төлбөр олгож байна.
Улсын Их Хурлаас 2023 оны 07 дугаар сарын 07-ны өдөр баталсан Нийгмийн даатгалын багц хууль 2024 оны 01 дүгээр сарын 01-ний өдрөөс хэрэгжиж эхэлсэн.
Нийгмийн даатгалын хууль тогтоомжийн шинэчлэлийн хүрээнд 2024 оноос даатгуулагчийн тэтгэврийн нэрийн дансыг тодорхой хэмжээгээр мөнгөжүүлж бодит хуримтлалтай болгох, нийгмийн даатгалын хамрах хүрээ өргөжиж малчид, хөгжлийн бэрхшээлтэй хүүхдээ асарч ажил хөдөлмөр эрхлэх боломжгүй эцэг, эхчүүдийн нийгмийн баталгаа хангагдах, даатгуулагч төлсөн шимтгэлтэйгээ уялдаатай тэтгэвэр, тэтгэмж авах шударга тогтолцоо бий болох эрх зүйн орчин бүрдсэн билээ. Мөн нийгмийн даатгалын салбарт үйлчилгээг бүрэн цахимжуулах, нийгмийн даатгалын сангийн төсвийн зарцуулалтыг ил тод болгох, мэдээллийг хүртээмжийг нэмэгдүүлэх зорилгоор 2024 оноос нийгмийн даатгалын мэдээллийн нэгдсэн шинэ систем нэвтрүүлж эхлээд байна.
Төв аймгийн Нийгмийн даатгалын газар энэхүү цахим хуудастаа нийгмийн даатгалын байгууллагын эрхэм зорилго, хэтийн зорилго, чанарын бодлого, ажилтны эрхэмлэх үнэ цэнэ, нийгмийн даатгалын байгууллагын бүтэц, газар, хэлтсүүдийн мэдээлэл, хууль эрх зүй, нийгмийн даатгалын байгууллагаас үзүүлж буй үйлчилгээ, шилэн данс, статистик, цаг үеийн мэдээ, мэдээллийг багтаасан бөгөөд Та нийгмийн даатгалын үйлчилгээг цаг хугацаа, орон зайг харгалзахгүйгээр шуурхай авах, нийгмийн даатгалтай холбоотой санал хүсэлтээ илэрхийлэх боломжтой юм.
Төв аймгийн Нийгмийн даатгалын газрын дарга С.Орхон